Fimmtán erfðafræðinemar úr VA og ME fóru í vettvangsferð til Reykjavíkur mánudaginn 23. nóvember undir stjórn kennara síns, Þórðar Júlíussonar.

Þar heimsóttu þau Blóðbankann, Íslenska erfðagreiningu og erfðafræðideild HÍ í náttúruvísindahúsinu Öskju. Í Blóðbankanum fengu þau fyrirlestur um starfsemina og skráðu sig flest sem blóðgjafa með tilheyrandi viðtölum og sýnatökum. Hjá ÍE voru þeim kynntar grunnforsendur fyrirtækisins og fengu fræðilega útskýringu á starfseminni. Auk þess fengu þau m.a. að kíkja inn í lífsýnageymsluna þar sem sýni úr um 120 þúsundum einstaklinga er að finna.

Í HÍ var þeim kynnt námsframboð skólans og starfsaðstaða í Líffræðiskor. Í lokin kíktu nemendurnir við í Land-og ferðamáladeild. Ferðin var vel heppnuð og ætti að vera gott veganesti fyrir nemedur sem eru að ljúka framhaldsskóla.