Fréttir og greinar

Merkasta ættfræðirit Austfirðinga var samið af sr. Einar Jónssyni frá Hofi í Vopnafirði á árunum 1880 til 1930. Ritið kom hins vegar ekki út fyrr en að Einari látnum, í átta bindum frá 1953-1968 auk nafnaskrár og var Austfirðingafélagið í Reykjavík útgefandi. Ritið hefur æ síðan verið aðalheimild ættfræðinga, Íslendingabókar og annarra ættfræðivefja um austfirsk ættartengsl. Árið 1965 stofnaði Benedikt Gíslason frá Hofteigi ásamt eftirlifandi börnum sr. Einars Menningarsjóð prófasthjónanna á Hofi. Höfuðstóll menningarsjóðsins voru tekjur af sölu á Ættum Austfirðinga og var sjóðnum ætlað „að styrkja bókasafn Eiðaskóla en ennfremur að styrkja og stuðla að söfnun og útgáfu á hvers konar austfirzkum ætta- og sagnafróðleik“. Þegar Alþýðuskólinn á Eiðum var sameinaður Menntaskólanum á Egilsstöðum tók ME við menningarsjóðnum og sá lager sem enn var til af bókunum var settur í vörslu Héraðsskjalasafns Austfirðinga. Fyrir allnokkrum árum var ákveðið að hefja vinnu að rafrænni útgáfu af Ættum Austfirðinga og skanna öll níu bindin. Þegar síðan var tekin ákvörðun um að sameina Menningarsjóð prófasthjónanna á Hofi við Skólasjóð ME fyrir fáum árum var jafnframt samþykkt að síðasta verkefni sjóðsins yrði að kosta gerð vefaðgengis að Ættum Austfirðinga. Var vefsmiðnum Eddu Jónsdóttur Langworth falið það verkefni að koma skönnuðum bókunum yfir á leitarbæran og samfléttaðan vef þar sem Austfirðingar geta nú með auðveldum hætti leitað forfeðra og formæðra sinna. Menntaskólinn á Egilsstöðum þakkar Eddu fyrir velunnið verk og Héraðsskjalasafni Austfirðinga fyrir samstarfið við að koma þessu langtímaverkefni í höfn.

Leiðin á vefinn ættir austfirðinga er hér http://www.aettiraustfirdinga.is/ 

Vefurinn var opnaður 1. desember en þá var einnig haldin 100 ára fullveldishátíð Íslands. Í tilefni dagsins er öllum boðið í Menntaskólann á Egilsstöðum frá kl. 13-15. Þar var hátíðleg dagskrá og alskyns sýningar frá ýmsum menntastofnunum á austurlandi og fleiri samstarfsaðilum. Nánari upplýsingar á www.fullveldi1918.is 

Jólakortasamkeppni Hollvinasamtaka HSA í samstarfi við Listabraut ME var haldin í þriðja sinn nú í ár. Aldrei hafa fleiri tillögur verið sendar inn en 40 tillögur skiluðu sér til dómnefndar. Það voru þær Alicja Wlodzimirow og Ísabella Mekkin Lilly Þórólfsdóttir sem deildu fyrstu verðlaununum að þessu sinni. Við óskum  þeim til hamingju með sigurinn. Ísabella er nemi á félagsgreinabraut skólans og er Alicja skiptinmei frá Póllandi og stundar nám á náttúrufræðibraut skólans. 

Kortin eru seld til styrktar Hollvinasamtaka HSA sem nýtir fjármunina til að styrkja heilbrigðisþjónustu á Héraði. Jólakortin eru meðal annars seld á skrifstofu ME

Austurfrétt.is fjallar um myndir þeirra og listakonurnar í frétt sinni sem má nálgast hér.

jolakort2018

Hátíðardagskrá verkefnisins "Austfirskt fullveldi - sjálfbært fullveldi?" verður haldið í Menntaskólanum á Egilsstöðum þann 1. desember næstkomandi frá klukkan 13 til 15. Skemmtileg dagskrá hefur verið sett saman og má þar nefna sýningar frá söfnunum í fjórðungnum, listasmiðju nemenda ME, grímur framtíðarsýn - sýning grunnskólanema af Héraði og veggspjöld frá nemendum. Þá verður umhverfisnefnd ME með sýningu, boðið verður upp á kleinu og pönnukökubakstur, jólaföndur, meistaraverkefni í sjálfbærri þróun verður til sýnis og áfram mætti telja.

Fram koma ýmsir listamenn; Kammerkór Egilsstaðakirkju flytur lög, Soffía Mjöll og Karen Ósk syngja, Jónas Reynir mun fjalla um fullveldishugtakið, Ása Þorsteinsdóttir verður með upplestur og hljómsveitin Dúkkulísurnar stíga á stokk.

Verkefnið er samstarfsverkefni 8 mennta og menningarstofnana þar sem margar hendur koma að undirbúningi og framvkæmd. Við hvetjum alla til heimsækja skólann okkar laugardaginn 1. desember og gera sér glaðan dag. Allar nánari upplýsingar má finna hér og á viðburðinum fyrir verkefnið. 

Sjáumst.

austfirskt fullveldi

Alltaf er verið að vinna í að betrumbæta skólastarfið og einnig skólahúsnæðið. Endurnýja það sem er orðið lúið af húsbúnaði og flíkka uppá. Liður í þessu var endurnýjun á nánast öllum rúmum á heimavistinni síðasta vor. Nú í haust komu svo ný húsgögn í anddyri kennsluhússins. Bláu pullurnar sem fylgt hafa skólanum lengi eru þó ekki horfnar, þær nýtast á neðri hæð kennsluhússins. Nýju húsgögnin bjóða upp á möguleika til samvinnu og samveru frammi ef skólastofurnar henta ekki. Sjón er sögu ríkari.

stolarsamvinna          heimavist 2

Árlega er boðið upp á áfanga í sviðslistum í tengslum við uppsetningu leikfélagsins ME á leikriti. Í ár er það Emilía Antonsdóttir Crivello sem kennir og leikststýrir. Áfanginn veitir grunnþekkingu í tækni og vinnu í sviðslistum. Nemendur kynnast ýmsum upphitunaræfingum og -leikjum og aðferðum spunavinnu auk þess að læra grunntækni í raddbeitingu, framsögn og hreyfingum á sviði. Einnig verður horft á upptökur af nokkrum sviðslistaverkum og verkefni unnin upp úr þeim.

Emelía starfar sem sviðshöfundur, leikstjóri, dramatúrg, danshöfundur og leiklistar- og danskennari. Hún hefur s.l. 11 ár kennt fjölmörgum nemendum bæði sjálfstætt og við ýmsa skóla, þar má nefna leiklist á leiklistarbrautum Fjölbrautarskólans í Garðabæ og Borgarholtsskóla, danssmíði í Klassíska Listdansskólanum og haldið regluleg dansnámskeið á Egilsstöðum undir nafninu Dansstúdíó Emelíu.

Emelía útskrifaðist af Sviðshöfundabraut Listaháskóla Íslands með BA gráðu í sviðslistum vorið 2015. Hún stundar nú Mastersnám í sviðslistakennslu við sama skóla.

Þegar eru 13 nemendur skráðir í áfangann en pláss fyrir fleiri. Ef einhverjir vilja bætast við er ráð að senda póst á áfangastjóra arnarsig(hjá)me.is eða skrá sig á listann í andyri kennsluhúss. 

Í fyrra var sett upp leikritið "Wake me up". Það verður mjög spennandi að sjá hvaða verk verður sett upp að þessu sinni.

Emilia      wakemeuphopur     

sviðslistir augl

Hafðu samband

v/Tjarnarbraut
700 Egilsstaðir
Netfang: skrifstofa@me.is
Sími: 471-2500
Kt. 610676-0579