Heimavist

Heimavistarreglur

1. Yfirstjórn heimavistar er í höndum skólameistara. Dagleg stjórn heimavistar er í höndum umsjónarmanns heimavistar sem er fulltrúi skólameistara en umsjón með og ábyrgð á að reglum sé fylgt hvílir á hverjum einstökum íbúa heimavistar.
2. Heimavistarbúar kjósa 5 manna vistarráð og fimm varamenn, skal það kosið innan tveggja vikna frá upphafi haustannar á almennum vistarfundi. Fráfarandi vistarráð situr fram að kosningum. Leitast skal við að meðlimir vistarráðs hafi sem fjölbreyttastan bakgrunn.
3. Skólameistari fer með dómsvald í málum er rísa vegna brota á heimavistarreglum. Dómum skólameistara má vísa til heimavistarráðs.
4. Almennan fund vistarbúa skal boða með sólarhrings fyrirvara með auglýsingum í húsum heimavistar. Einfaldur meirihluti ræður á fundum.
5. Reglur heimavistar skal endurskoða árlega en breytingar taka aðeins gildi að fenginni staðfestingu skólaráðs. Til að breytingatillögur verði bornar undir skólaráð þarf einfaldur meirihluti á löglega boðuðum fundi að samþykkja þær.
6. Heimavistin er heimili þeirra sem þar búa. Heimilismenn skoðast sem leigjendur að tilteknu húsnæði, réttindi þeirra og skyldur byggjast á leigusamningi og miðast við gildandi lög og reglur vistarinnar.
7. Vinnufriður skal ávallt vera á heimavistinni, jafnt á herbergjum sem á göngum. Frá kl. 24:00 til 7:00 dag hvern skal vera algert næði á vistinni. Næði skal auk þess vera til kl. 12:00 á sunnudögum og öðrum frídögum. Á námsmatsdögum skal vera góður vinnufriður allan sólarhringinn í húsum heimavistar.
8. Meðferð raflykla nemenda er á þeirra ábyrgð og óheimilt er að hleypa inn gestum eftir lokun heimavistar á virkum dögum. Gestir sem nemendur hleypa inn með raflykli um helgar eru á þeirra ábyrgð og ef þeir gerast brotlegir við heimavistarreglur þá getur viðkomandi nemandi misst raflykil sinn tímabundið.
9. Öll meðferð áfengra drykkja og annarra vímuvaldandi efna er bönnuð í húsum heimavistar og varðar brottvikningu er út af er brugðið. Þá er nemanda óheimilt að dvelja á heimavistinni undir áhrifum áfengis eða annarra vímuefna. Skólinn stendur fyrir reglubundnum og fyrirbyggjandi aðgerðum, svo sem utanaðkomandi eftirliti af hálfu lögreglu.
10. Reykingar, veip og önnur tóbaksnotkun er bönnuð með landslögum í öllu vistarhúsnæði ME og á lóð skólans.
11. Vistarbúar skulu ganga vel um hús, lóð og allt umhverfi. Herbergjum sínum skulu þeir halda hreinum og snyrtilegum. Bannað er að ganga á útiskóm um heimavistina og rusl á heima í ruslafötum. Umsjónarmaður í samvinnu við heimavistarráð lítur eftir því að þessu sé framfylgt.
12. Skemmdir á húsum eða munum skal tilkynna umsjónarmanni og ber að bæta þær að fullu. Skemmdir sem unnar eru vísvitandi varða brottrekstri. Heimilt er að taka af tryggingagjaldi heimavistarbúa uppí skemmdir/illa þrifin herbergi við endanleg skil að vori. Einnig ef lyklum og eða raflyklum sé ekki skilað.
13. Sérhver vistarbúi getur kært brot á vistarreglum til skólameistara eða umsjónarmanns heimavistar. Endurtekin brot á vistarreglum geta valdið brottrekstri.
14. Hús heimavistar eru læst á virkum dögum frá kl. 24:00 til kl. 05:45. Þá skal enginn óviðkomandi vera í húsum heimavistar. Umsjónarmaður heimavistar er á vakt frá kl 20:30 til kl. 00:30. Á föstudags og laugardags kvöldum er bakvakt og útihurðir læstar. Bakvaktarsími ME er 8487588.
15. Gestir á heimavist skulu almennt virða það að vistin er heimili íbúanna. Þeir skulu hafa vikið af vistinni fyrir 23:30 á kvöldin.
16. Gestir á grunnskólaaldri þurfa leyfi umsjónarmanns heimavistar til að heimsækja heimavistarbúa. Á vetrum gilda almenn viðmið um útivistartíma barna (kl 22:00)og dvelja grunnskólanemendur ekki lengur á heimavist en sá tími segir til um.
17. Vistarbúa er því aðeins heimilt að hafa hjá sér næturgest, að sambýlingur og umsjónarmaður /skólameistari samþykki. Næturgestir skulu eigi vera yngri en á 16. aldursári og verða gestir undir lögaldri að framvísa skriflegu leyfi foreldra. Sækja þarf um gestaleyfi til umsjónarmanns /skólameistara með minnst sólarhrings fyrirvara. Gestir eru að fullu á ábyrgð gestgjafa og ber þeim að hlíta heimavistarreglum. Sama gildir um gesti frá öðrum skólum.
18. Gestaleyfi eru ekki veitt á balldögum nema með leyfi skólameistara vegna sérstakra kringumstæðna. Ballvakt á heimavist er til kl 02:00 eða klst eftir lokun ballstaða
19. Vistarbúar sem hyggjast dvelja á heimavist yfir helgi skulu skrá viðveru/brottför hjá umsjónarmanni/skólameistara á fimmtudagskvöldi.
Yfirfarið og samþykkt á heimavistarfundi ME 1.sept 2019

Vinnureglur varðandi umgang starfsmanna ME um herbergi vistarbúa

Vinnureglur varðandi umgang starfsmanna ME um herbergi vistarbúa:

Tilefni þess að starfsfólk á vegum húsráðanda (Skólameistari, staðgengill skm, húsfreyja, gæslukennari, húsvörður, iðnaðarmenn) komi og banki uppá á einstaka herbergi getur verið:
1) Viðgerðir og viðhald húsnæðis og húsbúnaðar. (kl. 8-18)
2) Lokanir á gluggum, stillingar á ofnum, slökkvun ljósa og læsing herbergja á föstudagskvöldum og við upphaf lengri leyfa. (kl. 18-20)
3) Vikuleg, auglýst, herbergjaskoðun vegna eftirlits með þrifum og umgengni. (Kl. 20-22)
4) Veikindi vistarbúa.
5) Dempun hávaða frá hljómflutningstækjum, tölvum og sjónvörpum.
6) Könnun á boðum frá reykskynjara á herbergi.
7) Eftirlit vegna rýmingar húsnæðis í kjölfar brunaboða eða brunaæfinga.
8) Rökstuddur grunur um brot á heimavistarreglum (s.s. vímuefni, tóbak, næturgesti)
9) Rökstuddur grunur um háttsemi sem refsiverð getur talist skv. landslögum (s.s. innbrot, líkamsárás, kynferðisbrot)
Að auki getur komið til húsrannsóknar að hálfu lögreglu en í slíkum tilvikum er leitað samþykkis viðkomandi íbúa ef ekki liggur fyrir skrifleg heimild til húsrannsóknar.

Vinnureglur:
Í öllum tilvikum 1) - 5) skal starfsmaður á vegum skólans banka á herbergisdyr áður en inngöngu er leitað. Ef ekki er ansað/komið til dyra er starfsmanni heimilt að fara inn í herbergið ef dyr ólæstar en annars skal bankað aftur. Ef ekki er ansað í hið seinna sinn er starfsmanni heimilt að opna með lykli enda sé erindi hans það brýnt að ekki megi bíða betri tíma.
Í tilvikum 6) - 9): Bankað, viðkomandi gerir grein fyrir sér og erindi, opnar með lykli ef þarf.
Yfirfarið og samþykkt á heimavistarfundi ME 1. september 2019

Reglur um notkun öryggismyndavélakerfa ME

Öryggismyndavélakerfi eru í heimavistar- og kennsluhúsi ME.

Notkun öryggismyndavéla í ME byggir á lögum um Lög um persónuvernd og meðferð persónuupplysinga nr. 90/2018, Reglur um rafræna vöktun nr. 50/2023, Reglum um rafræna vöktun og meðferð persónuupplýsinga sem verða til við rafræna vöktun nr. 837/2006 og Lögum um framhaldsskóla nr. 92/2008

Tilgangur og heimildir

Rafræn vöktun með öryggismyndavélum í húsnæði skólans byggir á lögmætum hagsmunum og er metin nauðsynleg á grundvelli öryggis og eignavörslu, s.s. í tilviki skemmdarverka, þjófnaðar, slyss eða að farið er um húsnæði skólans í leyfisleysi. Verklagsreglunni er ætlað að tryggja meðalhóf, virða rétt til einkalífs, bæði nemenda og annarra sem fara um húsnæði skólans og að ekki sé gengið lengra í vöktun en nauðsyn krefur.

Vinnsla persónuupplýsinga sem verður til við rafræna vöktun byggir á heimildum skv. 9. grein laga um persónuvernd og meðferð persónuupplýsinga nr. 90/2018:

• Að vinnslan sé nauðsynleg til að fullnægja lagaskyldu sem hvílir á ábyrgðaraðila.
• Að vinnslan sé nauðsynleg til að vernda brýna hagsmuni hins skráða eða annars einstaklings.

Þá skal framhaldsskóli haga störfum sínum þannig að nemendur finni til öryggis (33. gr. framhaldsskólalaga nr. 92/2008).

Gildissvið og umfang

Öryggismyndavélar hjá ME eru stilltar þannig að upptaka hefst þegar vél skynjar hreyfingu. Þær eru á eftirtöldum stöðum í húsnæði skólans:

• Heimavistarhús ME
  • Við anddyri aðal og bakdyra inni og úti, á heimavistargöngum, í hátíðarsal og mötuneyti við þvottahús nemanda og á bílastæði nemenda skólans (17 vélar).
• Kennsluhús ME
  • Við báða innganga kennsluhúss og ganga bæði á efri og neðri hæð skólans, í fjölrými nemenda, á reiðhjólatæði og rafhleðslustöð ME (12 vélar).

Sérstakar merkingar eru settar upp um öryggismyndavélarnar til að gera nemendum, forráðamönnum, gestum og/eða starfsfólki sem á leið um húsnæðið viðvart um vöktunina.

Ábyrgð

Skólameistari er ábyrgur fyrir að lögum og reglum um rafræna vöktun og meðferð persónuupplýsinga sem verða til við vöktunina sé framfylgt og að farið sé eftir framhaldsskólalögum.

Skólameistari einn hefur heimild til að skoða upptökur. Aðgangur að öryggismyndavélakerfi er varinn með aðgangs- og leyniorði sem skólameistari ber ábyrgð á.

Kerfisstjóri hefur umsjón með virkni netþjóns sem staðsettur er í húsnæði skólans.

Persónuverndarfulltrúi fylgist með að farið sé að ákvæðum laga um persónuvernd og vinnslu persónuupplýsinga nr. 90/2018, er ráðgefandi um persónuverndarmál og tengliður við Persónuvernd.

Meginreglur og framkvæmd

Meðferð persónuupplýsinga sem verða til við rafræna vöktun skal vera í samræmi við 8. gr. laga nr. 90/2018 um persónuvernd og vinnslu persónupplýsinga;

1. að þær séu unnar með lögmætum, sanngjörnum og gagnsæjum hætti gagnvart hinum skráða;
2. að þær séu fengnar í skýrt tilgreindum, lögmætum og málefnalegum tilgangi og ekki unnar frekar í öðrum og ósamrýmanlegum tilgangi;
3. að þær séu nægilegar, viðeigandi og ekki umfram það sem nauðsynlegt er miðað við tilgang vinnslunnar;
4. að þær séu áreiðanlegar og uppfærðar eftir þörfum;
5. að þær séu varðveittar í því formi að ekki sé unnt að bera kennsl á skráða einstaklinga lengur en þörf krefur miðað við tilgang vinnslu;

Vöktun og verklagsreglu þessa skal kynna nemendum og starfsfólki:

• Kynning á rafrænni vöktun er í upphafi skólaárs, bæði til nemenda og starfsfólks.

• Reglur um notkun öryggismyndavélakerfa ME eru á heimasíðu skólans.
• Á fundi skólameistara og heimavistarstjóra með heimavistarbúum í upphafi annar fá þeir fræðslu um rafræna vöktun í heimavist, s.s. um tilgang vöktunarinnar, hvaða búnaður er notaður (myndupptaka án hljóðs), hver hefur aðgang að upplýsingunum og hversu lengi þær eru varðveittar.
• Í leigusamningi sem heimavistarbúar (og forráðamenn íbúa yngri en 18 ára) og skólameistari undirrita við upphaf búsetu/dvalar á heimavist er einnig vakin athygli á vöktuninni og heimavistarbúar skrifa undir samþykkisyfirlýsingu um notkun þeirra.

Varðveisla persónuupplýsinga sem verða til í myndefni við rafræna vöktun

Myndefni sem verður til við vöktun er vistað á sérstökum aðgangsstýrðum netþjóni innan skólans. Það er aðeins skoðað ef upp koma atvik sem varða eignavörslu og/eða öryggi, s.s. þjófnaður, skemmdarverk eða slys. Myndefnið geymist að hámarki í 30 daga og eyðist þá sjálfkrafa.

Skoðun persónuupplýsinga í myndefni sem verður til við rafræna vöktun

Persónuupplýsingar sem til verða við vöktunina eru aðeins notaðar í þágu tilgangs með söfnuninni og að því marki sem nauðsynlegt er (sbr. kaflana hér framar: Tilgangur og heimildir og a. liður í kaflanum Meginreglur og framkvæmd).

Sá sem sætt hefur rafrænni vöktun á rétt á að skoða myndbandsupptökur sem til verða um hann við vöktunina og að fá afrit af myndefninu, svo framarlega sem það skerðir ekki réttindi eða frelsi annarra. Skólameistari hefur einn heimild til ákveða að upplýsingarnar sem verða til við vöktunina skuli skoðaðar enda er hann einn með sýniaðgang af kerfinu. Skólameistari skráir beiðnina í lykilorðavarða atvikaskráningu, ef þurfa þykir.

Umsjónarmaður heimavistar, sem er bundin trúnaði og þagnarskyldu vegna starfa sinna hefur heimild, ef þörf er á, til að skoða upplýsingarnar með skólameistara. Ákvörðun skólameistara um skoðun á myndefni og málsmeðferð skal skrá í lykilorðavarða atvikaskráningu.

Beiðni um leit í upptökum eftirlitsmyndavéla

Munnlega eða skriflega beiðni um leit í upptökum eftirlitsmyndavéla skólans skal komið á framfæri við skólameistara: Tilgreina skal tilefni og tímamörk umbeðinnar leitar ásamt nafni þess sem biður um leit, símanúmer hans og netfang. Skólameistari stofnar mál í lykilorðavarða atvikaskráningu um beiðnina og skráir hana svo og málsmeðferð.

Afhending persónuupplýsinga í myndefni sem verður til við rafræna vöktun

Persónuupplýsingar í myndefni sem verður til við vöktun eru ekki afhentar öðrum og ekki unnið með þær nema með samþykki þess sem upptakan er af eða með heimild Persónuverndar. Undantekning frá þessu er að skólameistara er heimilt að afhenda lögreglu upptökur, varði þær upplýsingar um slys eða meinta refsiverða háttsemi.

Fjölgun öryggismyndavéla í húsnæði eða á lóð skólans

Þyki mikilvægt að setja upp öryggismyndavélar á fleiri svæðum en tilgreind eru hér að ofan lætur skólameistari skoða sérstaklega hvort ætluð staðsetning og tilgangur sé í samræmi við lög og reglur um rafræna vöktun. Rökstudda ákvörðun skal vista skjalastjórnunarkerfi skólans.

Andmæli og ábendingar um rafræna vöktun

Andmælum við framkvæmd vöktunar eða ábendingum um að vöktun uppfylli ekki kröfur í þessari verklagsreglu eða lögum, skal koma því á framfæri við persónuverndarfulltrúa ME hulda@me.is ( eða í síma 471-2500). Persónuverndarfulltrúi stofnar mál í skjalastjórnunarkerfi skólans um andmælin, skráir þau og málsmeðferð.

Tekið fyrir og samþykkt á fundi skólaráðs 2.10.2024

Heimavistarráð

Heimavistarráð er skólameistara og húsfreyju/húsbónda heimavistar til ráðuneytis um málefni heimavistar og mötuneytis. Heimavistarbúar kjósa fimm manna vistarráð og fimm varamenn, skal það kosið innan tveggja vikna frá upphafi haustannar á almennum vistarfundi. Fráfarandi vistarráð situr fram að kosningum.